نئجه سن
ای جانیم اوچون دردیله درمان نئجه سن؟
ای روحوم اوچون سئوگیلی جانان نئجه سن؟
سندن یاپیشیب ایمداد ائدیر عشقیله کؤنلوم
ای هر ایکی دونیامه ده سلطان نئجه سن؟
روحوم منی آسوده دولاندیرمادی هئچ واقت
ائتدین منی هر آندا پریشان نئجه سن؟
سنیسیز یاشاماق کؤنلومو مین درده سالیب
بیر تک باخیشین ائیله دی ویران نئجه سن؟
بیر عهد ائله آتما منی یاددان قیراغا
ای عشقیم اوچون عهدیله پیمان نئجه سن؟
سَسسیزدی آدیم سسله منی بلکه دانیشدیم
سن قلبیمه هم دویغوما زندان نئجه سن؟
قوشما
ته له س سن
گیلئی ائتمه حیاتادان بو دونیادان
دئییب گولوب دانیشماغا ته له س سن
سیزیلداما کدرلنمه غم یئمه
عشق اودوندا آلیشماغا ته له س سن
حیات کئچیر آغلاساندا گولسن ده
بو سیر سؤزو آنلا دوشون بیل سن ده
اینسانیق بیز بولبول منده گول سنده
اوزاق گئتمه قاریشماغا ته له س سن
گئجه کؤچر آیدین گونش نور ساچار
قارانلیقلار بوتون باش توتوب قاچار
آیدین گونش کدرلی قلبی آچار
کوسمه بوگون باریشماغا ته له س سن
سئوگی وئریر حیاتیمیزا قیمت
باشقا یولو عشقیمیز آچیر البت
یاشاماغا اینسان اوره یی زینت
محبتده یاریشماغا ته له س سن
باشی اوجا کؤنلو آچیق دولاندیق
زمانه نین بوروغوندا بولاندیق
کیمسه لره باش ایمه یه اوساندیق
صداقتله له چالیشماغا ته له س سن
گه لدی گئده ر اولدو بو بئش گون حیات
آزیمی دا همیشه بیلدیم زیاد
بیز گئده ریک قالار یئنه بو بساط
عشق اودوندا آلیشماغا ته له س سن
صداقت له چالیشماغا ته له س سن
قوشما
دارالدیب
غصه لریم غم داغینی یارالدیب
فلک منیم ائل باغیمی سارالدیب
هیجران دوروب دووار کیمی قارشیمدا
گؤزلریمین لاپ آغینی قارالدیب
غم غصه سیز یاشاییردیم ائلیمده
فلک ووردو سیندی قولوم. بئلیم ده
هئچ بیری ده قارا قالمیر تئلیمده
حیات سولو هم ساغیمی دارالدیب
کدر منی مین بیر درده قالادی
بیرجه ایچیم سویا زهر جالادی
آغی منه سانکی شیرین لالادی
کدر منده ن گؤر بیر نه لر یارالدیب
غم دولاشیر تئل لریمده بیر به بیر
غصه منیم کؤنلومو دیبده ن که سیر
دادلی گونلر چوخ گئدیر آز آز گه لیر
شیرین یولو آجی یوللار دارالدیب
سه سیم گه لمیر ائشیتمیرسن غمیمی
سه س سیزم من بوغموشام اؤز سه سیمی
یاشامازسان بیر آن بیرجه دمیمی
فلک بوتون یول به ره نی دارالدیب
مثنوی سایاغی
سئوگی شعری
یوخدور بو جهاندا سنه تای سئوگیلی جانان
ایستر سنی هر آن بو یازیق کؤنلو پریشان
دون غصه ایله بیر یئره واردیم کی قارالدیم
بیر آن یوزونون فیکرینه دوشدوم و آییلدیم
سنسیز بو یانار کؤنلومو بیر آن قانان اولماز
سنسیز منیم احوالیما هئچ بیر یانان اولماز
سنسن بو کؤنول یوردومون عشقین قازانان یار
سنسن ازلینده ن منه سئودا یارانان یار
سنسن بو یازیق کؤنلومون آرام و قراری
عشقیله یاراتمیش سنی کؤنلومده کی تاری
یار اولماسا ویرانه یه بنزه ر ده لی کؤنلوم
هر آندا سئوه ر نازلی نیگاریم سنی کؤنلوم
معشوقه سیز آنلار اینانین کؤنلومو سیخماز
عشق عالمی نین دردری منیم کؤنلومو ییخماز
معشوقه دئییل دیر منه بیر زولفو پریشان
ائل دیر وطنیم دیر منه معشوقه و جانان
عشقیم وطنیم دیر کی کیچیک قلبه سیغیشماز
چای لاردان آخان سئل گؤزه لیم گؤلده ییغیشماز
چوخ چوخ سئویره م اؤلکه ده چه ه چه ه وورا بولبول
خوش یاز هاواسی نازلانا هئچ سولمایا بیر گول
یوردومدا وطن سئومه ین اینسان اولابیلمز
باغوان آییق اولسا گولون هئچ کیم یولا بیلمز
سه س سیز دئمیره م قیشقیریرام یوردوما قوربان
یوردون وطنین سئومه لی دیر جانلی هر اینسان
تک بیت لر
عاشیق اولدور ائتمه یه جان قئیدینی جانان یولوندا
آتمایا یاددان وئره جان باغلامیش پیمان یولوندا
سانکی یلدا یازیلیب عؤمرومون آغازی سونو
نئچه قوربان دئمیشم تا کی قانام بیر آن اونو
سنی گؤردوکجه گؤزوم کؤنلوم ائدیر آه و فغان
سنسیز هئچ آنلامیرام لذت دونیانی اینان
کؤنلومده حسادتلره یا کین لره یئر یوخ
چونکی بو کؤنول عشقیله مئهریله دولوب چوخ
یای چشمینده ن آتیب تیر محبت لری او
بیر نیگاهیله بو قلبیمده ن اوجوز آلدی منی
آرزیم بودور بیر قارا گؤز یاریم اولا
میضراب اولام اودا منیم تاریم اولا
آتالار وار زهر یاغار گؤزونده ن
آتالار وار بال سوزولر گؤزونده ن
آنالار وار ائولادینی دؤیوده ر
آنالار وار کوراوغلولار بؤیوده ر
یانمیش اوره ییم وصل ایله درمان اولار ای گول
حوسنون گؤره هر کیم سنه حیران اولار ای گول
قلبیمده کی بیر دردیمی من سؤیله سم هر جان آغلار
وصل ایله گه لیب یان یانا ظلم ائیله ین هیجران آغلار
من کی سنسیز آیریلیقدان قیزاران کؤز کیمی یم
گر مین ایل عؤمروم اولا یولدا قالان گؤز کیمی یم
عشق دردینده ن من آیریلسام حیاتیم قورتولار
کؤنلومون شن باغلاری باد خزانه یورد اولار
دونیانی من سئویره م سن کیمی جانانه گؤره
قورخورام سئوگی میزی یاد بیله بیگانه گؤره
غزل
حاق سئوگیسی
قانلی جامیم الده کن اولدوم بو دونیادان غفیل
نوش ائده رکن جامی تاپدیم کل اسراره دلیل
حقیله اولموش به هه ر لی بیل حقیقت گولشنی
حقی اینکار ائیله ین ظالیم ندا اولسون ذلیل
جوشدو کؤنلوم دیندی بو دینمز دیلیم داغلاندی کی
های هارای لار سالسین ائلده باخبر اولسون جلیل
دونیادا ساغدیر بوتون نالایق اولموش هر نه لر
شن گونه ویجدان و اینسان حقی دیر اولموش علیل
من دئییم سنده ائشیت آمما عمل قیل سؤزلره
ایسته شاد اولسون هامی شادانلیغا اولما بخیل
بیل کی هر دؤرد سوی دان محصور اولوبسان دونیادا
تکجه یار اول حقیله دوزلوخلارا سن دوش دخیل
سه س سیزه سن قیل نظر آنلا گؤزه للیک معناسین
ایسته حقده ن بنزه سین سه س سیزلره هر بیر نسیل.
غزل
تانری عشقی
ساقی یئنه وئر بیر دولو ساغر من بیچاره یه باری
آهسته کرم قیل قدمین قوی یئنه ویرانه یه ساری
نوش ائتمه یه درویش لرین گؤز یاشینی قصد قیلیبسان
جانیمدا منیم اؤز اؤزومه یوخ یوخ اولوب یوخدودا واری
لطف ائیله منی آتما نظردن سنه وورغوندو بو کؤنلوم
باشیم آغاریب هئچ سنه قوربان دییه سن قاشدا آغاری
سنده ن سنه اذن ایسته یه ره ک وئردی کؤنول قوودو نیگاهین
گه ل چک منیم هیجران آدینا قلبه باتان زهرلی خاری
گؤزلر منه مکر ائتمه یه بیلمم کی نییه مایل اولوبلار
یانغین اوره ییم سؤندوره جک سنده کی هر آتش و ناری
من عشقیده شایسته لیگیم ثابت ائلیردیم سنه قاچدین
سنده سورا هر دردیمه درمان تاپابیلدیم سازی تاری
عشقین ظفرین بایرام ائله ردیم منه گر همدم اولایدین
آلدانما منیم سؤزلریمه عشقینه لایق اولان اول تکجه دی تاری
بایاتی
عزیزیم گوله خوشدو
بولبول لر گوله خوشدو
آتا آنا زحمتی
هر نه چوخ اولسا خوشدو
عزیزیم ائله یاندیم
باشیندا تئله یاندیم
آیریلیق هیجرانا یوخ
ووردوغون فئله یاندیم
تانری منیم سیرداشیم
اودور اولوی یولداشم
هر بیر ظولمه دؤزه ره م
اولو تانری یولداشیم
دؤردلوک لر
آتا
حکمتلی آتایدین بیزه همده ائلیمیز چین
روح وئردین آتا هم ائلیمیز هم دیلیمیز چین
وارسان او جلالینلا همیشه یادیمیزدا
قدرتلی دایاغسان دیلیمیز چین بئلیمیز چین
یاشاماق
اؤلومه هئچ زامان اییلمه ره م من
یاشام دیر آرزوم یاشام دیر هر شئی
یاشاماقلا اینسان باجاریق آچیر
اؤلوم وارسا یاشاماقدا گه لیر هئی.
عشقین کؤزو
گئجه گوندوز گه زیره م خیال آدلی دونیانی
یول لاریم قاردی بوراندی دولودور نیسانی
گه زیره م دونیانی هر یانی، صداقت یوخدور
داها عشقین کؤزو سؤنموش سینیلیب قلیانی
قوجا یاشادیم
بو گه لیشی بو گئدیشلی دونیادا
قلبی گئنیش باشی اوجا یاشادیم
دویغولارا اینسانلارا ائل لره
جاوان ایکن چوخدا قوجا یاشادیم
سؤز اولسا
گؤلگه لره سیغیشمارام بیرجه آن
من بیر ائلم او بیر کنده بنزه مز
دوشونجه ده ن دویغولاردان سؤز اولسا
من باغیر رام او بیر کلمه سؤیله مز
یاشام
دوز ایشله ییب دوز یئگینن دوز یاشا
اینسان یاشا آزاد یاشا آز یاشا
یامان لارا یاناشماغی سان حاشا
صداقتله سن عؤمرونو وور باشا
سو، آب
سوسوز اولسا منیم او نازلی او کؤرپه به به ییم
سودییب دیلله نه جک آنلامامیش آب نه مه نه
کؤینه گین ییرتیغینی تیکماغ ایچون بورماغ ایچون
نخ دئمزکی ساپ دییب آختاراجاق قاری ننه
اؤلوم
اوره ییم مانقال اولوب عشقیم اودوم منده اودون
یانیرام لاله کیمی سؤندوره نیم یوخدو منیم
غصه لر گَلمیش ائلیم غمله دولوبدور بو گئجه
حاضیره م اؤلمه گیمه اؤلدوره نیم منیم
شهامت بؤلگه سی
دالدالانماق ایسته میره م
قورخولارین کؤلگه سنیده
من یاشاماق ایسته ییره م
شهامتین بؤگله سینده
دیل
قویما دوشمن چنگه له سین دیلینی
قول قیچینی جانینی قوی دوغراسین
دیلی ساخلا جانین اگر گئتسه ده
قوی بو دیلین میلتیوی اوغراسین
چالقی چی
اویما چال چالقی چی ، آغلات منی نئی لی
ساقی تؤک جامیمی دولدور یئنه مئی له
های لا یاتمیش لاری میخانه یه سه س له
اؤنجه مئی وئر سونرا گئت نئی له سن ائیله
شهید
عشقین یولو حیات یولو
سن گئتدیگین قانلی یولدو
اونوتماریق، سنین یولون
اونودولماز جانلی یولدو
سیرریم
گه ره یی یوخ هر یئته نه دئمه یه
زامان داشیر منیم اوره ک سؤزومو
آچمامیشام هئچ کیمسه یه سیرریمی
گه له جه یه زیلله میشم گؤزومو
یاشاماق
سنین منیم حاققیمیزدی یاشاماق
بو دونیادان نئجه دویوم دویمارام
گؤزه ل لیک لر گؤزه ل له شیر گئتدیکجه
من بو حالدا نئجه اویوم اویمارام
طبیب
الحذر قیل دردیمه سن ائتمه درمان ای طبیب
وئرمه ره م دردی اگر وئرسنده درمان ای طبیب
غم بوتون اینسانلاری ائیلر صداقتدن غنی
دویغولو اینسانلارین هر آنی عرفان ای طبیب
اوشاق ادبیاتی
اؤیره نجی احوالاتی
درس اوخویان بیر اوشاق
بئش آلمیشدی بیر قوجاق
باخمامیشدی درسینه
یول گئتمیشدی ترسینه
دوستو قبول اولموشدو
او گول کیمی سولموشدو
حالینا آغلاییردی
غم غمه باغلاییردی
گؤروردو یولداش لاری
همده کی قارداش لاری
اویناییب هم گولورلر
بونون حالین بولورلر
* * *
وئریردیلر سَس سَسه
امید قالما هئچ کسه
واختیندا گؤر ایشینی
سیخما ایندی دیشینی
زحمته قاتلانماسان
کؤرپودن آتلانماسان،
کیمله باریشماق اولماز
گولوب دانیشماق اولماز
* * *
اوشاق چوخ فیکره دوشدو
اولدوغو حالدان اوشدو
گئری دؤندو بیر قدر
گؤرسون نه قویموش اثر
آغلامسیندی آغلاندی
غمدن غمه آتلاندی
آنلادی سوسدو دیلی
زای ائیله ییب بیر ایلی
قاریشقایا ساتیبدیر
بیر دانا هوندور فیلی
* * *
بؤرکون قویدو قاباغا
دایاندی بیر قالاغا
فیکره گئتدی بیر آنلیق
گؤردو چؤکوب قارانلیق
گون گئچدی آخشام اولدو
گولوشدن ناکام اولدو
گونلر گئچدی بیر به بیر
دره چوخلو زیروه بیر
گؤردو قالیب بی نشان
اولوب غملی پریشان
یوخدور اونو دینله ین
یوخ آختاران ایزله ین
آیریلیب ائودن ائلدن
دوشوبدور داها دیلدن
نه دیندیرن وار اونو
نه گولدورن وار اونو
ائله بیل کی قورتولوب
گه لیب حیاتین سونو
* * *
فیکیرلشیب تاپدی او
درده درمان یاپدی او
زحمته قاتلاندی چوخ
یاد گؤزونه ده یسین اوخ
باشلاییب آچدی کیتاب
یازدی قوتولدو حساب
اولمادی شرمنده او
گئتدی بوگون کنده او
* * *
هامی دئییردی سالام
ساغ اول منیم گول بالام
واختیندا آچ گؤزونو
سونرا اؤیمه اؤزونو
ساغ اول کی تئز آنلادین
کیتابلاری یانلادین
اوخودون ائتدین تامام
قالمادی هئچ بیر کلام
آنلا دوشون همده قان
عشق اودونا سنده یان
دوشونجه لی انسان اول
بو دونیایا خئییر دول
علم اوخو عالم یاشا
صحیح و سالم یاشا
اکبر رضایی
(چوخدانکی شعیرلریمنن بیریدیر کاغاذ پارا آراسیننان تاپمیشام)
قوشما
ایلک سئودا
من ایندیده ن خوشوم گلیر
سونرالاری سئومه ییرم
بو آن بوگون حایات دیر
یارین لاری گؤرمه ییرم
سن اولدوز اول سن گونش اول
تورپاغ اولوم باخیم سنه
سئوگی پایلا حایاتیما
بو کؤنلومو یاخیم سنه
سن اینسان اول دوشونجه لی
من قول اولوم عؤمور بویو
سن راحات اول منده راحات
آی عشقیمین ایلکی سونو
sessiz
غزل
صاحبخانه
عالی اینسانلار سایاق سان، سنده بیــــــــر فرزانه سن
لیلی سن عاشیق شوناس سان، لعل سن دوردانه سن
یئر گؤیو غم توتسادا، ســـن خوش گولوش سن بیزلره
راحتِ روح و روان، هنـــــــــــــگامه سن جانانه سن
ضامن بــــــــــــزم محبت، شعرسن، سن هر بیر آی
آیلی اولدوزلــــــــو گونش سن، نورا سن کاشانه سن
اینسانین علویتی دیلــــــــــــــــــده صفادیر بیل بونو
حُسن رویین له صــــــــــــفا بزمینده سن یکدانه سن
تکجه یاریـن، سن بیـــــلیرسن اولماز عاشیقلیک سونو
شمع سن سن، بزم سن، آتش لـــــــــــره پروانه سن
ایل به ایل آرتیر سنین سئوگین بیــزیم دیل لرده بیل
مایل اولـــــــــــــما غصه یه قودرتلی سن مردانه سن
یئل کیمی گلمیش و یئل تک ده گئده ر غصه کــــــدر
یای پاییز، قیش یاز سنین دیر، عـــــؤمره صاحبخانه سن
اکبر رضایی sessiz
غزل
آتام یادیما دوشدو
آسوده یاتیبسان آتا سندن خبریم یوخ
سنسیز گونشیم یوخ ایشیقیم یوخ سحریم یوخ
سن خوش گون ایدین خوش گونوموز سنله یاشاندی
مین ییل دا یاشارسام بئله سی هئچ بَهَریم یوخ
ضولمت قارا ضولمت دی ایشیق ذره جه یوخدور
بیر لامپا چیراغ ائوده و چؤلده قمریم یوخ
داغلار سنی باغلار سنی چؤللر سنی سَسلیر
سه س سیزجه هارای سالدیم هاییمدا که سه ریم یوخ
A.R.SESSIZ
عاشیق قارداش
عاشیق قارداش
عاشیق قارداش غصه لنمه غم یئمه
گلر بیر گون سن آختاران او باهار
سئوینج آلار سنین کؤنول باغینی
قوجاغیندا گلر سئوگیلین یاتار
بؤیله گلمیش بؤیله گئده ر بو زامان
کیمسه دن یوخ نه بیر صدا نه هایان
محبتی هم ساتان وار هم آلان
عجب یئردی عجب یورددی بو دییار
روزگاریمیز هایلی هویلو دولاندی
حسرتیله گؤزلریمیز سولاندی
سئوگیلیمیز قان یاشینا بولاندی
بؤیله گئتسه هاممی جانینا قییار
سه س سیز گه لیب سه س سیز گئدیر غم کدر
درد سونوندا منی ییخار یا اَزر
کدرله غم مزار داشیمی بَزه ر
بیر گون اولار منده گونشیم باتار
sessiz
ترجمه
خیام رباعی لریندن ترجومه
حیف اولدوکی بو عؤمروموز الدن گئتدی
قان اولدو جییه رلر فه له یین چرخیندن
بیر کیمسه خبر وئرمه دی اول دونیادان
گئتمیش لرین احوال لاری نین چونیندن
ای دل کی زمانه سنه چوخ غم وئردی
بیر دمده آلار جانی کی بیر دم وئردی
یاشا خوش، گَز و دولان بئش گونووی
قبل از کی سنین قبرین ائوی نم وئردی
قوشما
داها کدر بسدی بیزه به سیمیز
غصه کدر بوراخماییر پئشیمی
سانکی ائکیز دوغولموشوق ایکیمیز
دردیم آرتیر یاشلاندیقجا هر بیر آن
یاددان چیخیر هر کیمسه میز که سیمیز
آمما سئوگی بو کؤنلومده جانلانیر
سئوگی جوشور زامان سانکی دال قالیر
عؤمر عاشیقی تامام سئوگی دن چالیر
قوی اوجالسین یاشاماقلا سه سیمیز
گه لیب گئدن بیر روزگارا بنزه دیق
عؤمور بویو سئوگیلینی گؤزله دیق
یار گلمه دی گئجه گوندوز ایزله دیق
داها کدر بسدی بیزه به سیمیز
سنسیز یاشاماق
سنسیز یاشاماق دردایمیش ای سئوگیلی جانان
غم غصه کدر هر گئجه مهمانیم اولورلار
عشق عالمی نین وورغونو آسوده قالانماز
اوندان دی گؤرنلر منیم حئیرانیم اولورلار
سنسن منیم هر آنداکی فیکریم و خیالیم
کؤنلومدور اینان غصه لی هم باشی بلالیم
یان گزمه گؤزوم نورو گه لیب گؤرده بو حالیم
دورگه ل کی قدم لر منه درمانیم اولورلار
A.R.SESSIZ
آتا
آتالار گونون تبریک ائده ره ک رحمتلیک آتامین ساغلیغیندا بیر شعیر یازمیشدیم و دفالارجا آتالیغ حاققینی آنلادیغیمی بیلدیرمک ایچین اوخودوم.
آتا
قورخمارام دونیا بویو کؤنلومه بیــــر داغدیر آتا
گول لـــــرین غنچه لی واختی گؤرونن باغدیر آتا
قولومو کیمسه بورانماز منیم عـؤمـروم بویونو
نییه کی آرخامی توتموش هه له ده ساغدیر آتا
آزمیش ائولادینا پرخاش ائده جک هــر بیــر آتا
دوز یولو گئتمــاغا ویجدان ایله قــالماغدیر آتا
داغی ده ل لم، داشی یوننام،آتا نفسی نن اینان
آتا جرأت دی مــنه، قـورخویــا دوستاقـدیر آتا
اونــودولماز آتــانین زحمتی هئــچ بیــر اوغولا
(سه س سیز)ین وار یوخو هم گؤی لره بایراقدیر آتا
A.R.SESSIZ
اوشاق ادبیاتی
آنا وطن
نه گؤزه ل سن آنا وطن
سن سن منه آنا، وطن
گول چیچکلی باغلارین وار
چوخ ویقارلی داغلارین وار
تاریخینه وورغونام من
شهریارام وورغون ام من
قوینوندا بسله دین منی
چوخ سئویرم منده سنی
وطن وطن جانیم وطن
داماردا آل قانیم وطن
سن آنامسام همده آتام
نئجه اولار سنی آتام
عشقین اولوب منیم جانیم
فخرین اولوب آدیم سانیم
شرف غئیرت کانی وطن
سئومه یه نین هانی وطن
قوینوندا بسله دین منی
اونوتمارام بیر آن سنی
وطن وطن جانیم وطن
داماردا آل قانیم وطن
A.R.SESSIZ
بیلمهدیم
بیلمهدیم
دیلبرین لــعل لـبیندن بـوسه آلـدیـم بیلمهدیـم
بوسه مست ائتدی منی قوینوندا قالدیم بیلمهدیم
شـهد شیرین تک لب دیلبر منی مدهوش ائدیب
بیر عـؤمور معشوقهسیز دونیاده قالدیم بیلمهدیم
روحومو چرخ فلک دیلبرسیز ائـتمیش نئیلهییم
عشقی اؤز فیکریمده من آواره سالدیم بیلمهدیم
نئیلهدیم فیکریم منیم کؤنلومه هئچ یار اولمادی
گاهدان اویدوم باشیما هم فیکره دالدیم بیلمهدیم
دیلبرین عشقی دولوب کونلوم داشیر باشدان باشا
تار کامانچام اولمادی دونبک له چالدیم بیلمهدیم
ساچلاریم دن دن آغاردی تئل لریم الدن گئـدیر
دورر تک عؤمرو سراسر داشه چالدیم بیلمـهدیم
عشق سولطانی منیم روحومدا جولان ائیـله دی
دیلبریمدن بیر عؤمور من آیری قالدیم بیلمـهدیم
A.R.SESSIZ
معلم
معلم
ایشیقلی سان نورلو سان حرارت لی دونیاسان
وارلیـــق اوزره، حـــــیاتا طراوت لی دونیا سان
سندن آلیـــــــر کایــــــنات یاشایشین معناسین
اولــــــو آتـــــا بابــادان روایت لی دونیا سان
سنین دئدیک لرین له اوره ک گؤزون آچیریق
بیــــزه باخیش وئرماغا سخاوت لی دونیا سان
سن گؤزومون نوروسان اوره ییمین سئوگیسی
محبـــت ده، سئوگی ده، قیامت لی دونیاسان
سن اولماسان بیلمه ریک بیر نَدی یا یوز نَدی
تانری قبول ائتمه گه مین آیت لی دونیاسان
اوزاق کنـــــده اوبایــــا عاشــــقانه گئـدیر سن
بیر اؤیرَنجین اولـــسادا صلابت لی دونیاسان
سن ایلــــه معــنا تاپیر فیکریمیزده کی سؤزلر
هــــر ســؤزومه فیکریمه امانت لی دونیاسان
گون به گون آرتیــرسنین عزتین عالمده بیل
بوتون بـــو اینسان لارا کرامت لی دونیاسان
غمین دردین اولــــسادا آرزولارین ســولسادا
بیـــــــــزیم بــو قلبیمیزده ولایت لی دونیاسان
سن یول آچیرسان بیزه اوره ک سؤزون دئماغا
یـــاخشی یا دا پیــــسه ده رضایت لی دونیاسان
چوخ سؤزومو بیلمیره م الیف نه دی ب نه دی
عالــــــمین اســـــــرارینا دلالت لی دونیا سان
آجیقــلی اولساندا سن، هاممینی چوخ سئویرسن
بیــــــر فیــــــکیرلی آنا تـــک لطافت لی دونیاسان
چـــوخلاری بیلمیــر کی سن فیکیرچی سن نه زرچی
اؤز باهــــــا ســـــرمایه نه کرامت لی دونیاسان
پاییزدادا قیش دادا ســــؤزون گـول تک آچیلیر
اؤلــــکه میزین یازی تک لطافت لی دونیاسان
فیـــکیر سیز اولسام بیر آن، یوردوما باغلانماسام
بیــــــر مئهــــریبان باجـــی تک ملالت لی دونیاسان
همیشه قارشیمـــــــداسان تـازه بیر باخیش ایله
هـــر ســــؤزومه فیــکریمه دلالت لی دونیاسان
محبتین لـــذتیـــــن، سنــــله دوشـــوندوم اینان
مینـــــلرجه اؤیرنجی یـــه، شرافت لی دونیاسان
هـــاردا دئدیم دانیشـدیم، دینمه دانیشما گؤردوم
منیـــــم بــوتــون دویغـوما طراوت لی دونیاسان
آنام آتامسان منیــــم سـن اؤزومده ن اؤزومسن
اویغـــــوما هم دویغـــــوما صداقت لی دونیاسان
منیــــم دیلک لریمی ایسته ییمی آنــــــــلادین
اینجـــــه ایپــــک قلبـــلی نجابت لی دونیاسان
دینیــــب دانیشــاندا من ساغدا سولدا دانلاییر
منیم هــر بیــر سؤزومه قضاوت لی دونیا سان
سن عالــــمین دردینه عــلاج ائدیرسن هر آن
کافــــره هــــم مــــؤمنه شفاعت لی دونیاسان
کــــرامت آرتیـر داشیر باخیشیندان اوزونده ن
دونیــــــانین احوالیــنه قناعت لی دونیا سان
گؤندوز ایتیـــر دیک یولو، قالدیق آواره چؤلده
قارانلیق توتان یـــولا بصارت لی دونیا سان
مین جوره اینسان گــه لیر سنین کیلاس لارینا
هـــر بیرینه مین جـــوره حکایت لی دونیا سان
تکجه الیف بِئی دئییل، بیر یا ایکی، اوچ دئییل
منیـــم اوره ک اوردوما شجاعت لی دونیاسان
حیات بیـر آیری یولدا، سن عشقینین یولوندا
معـــــشوقون جفاسیـــــنا دیانت لی دونیاسان
قیشدا قاردا کولکده صاف عشقین وار اورکده
قــوروتولــماز بو دیلک ده شرافتلی دونیاسان
(سه س سیز) ه سه س وئریرسن قورخولاری قووورسان
بوتون کــور دیلک لــره ضیافت لی دونیاسان
A.R.SESSIZ
یاز گلدی
یاز گلدی
یاز گلدی چیچک لر دانیشیر بولبول ایلن
یئل باغرین آچیبدیر اؤپوشور سونبول ایلن
دوزلرده و چؤل لرده گَََََََزیر شئه چمنی
گون گون بوی آتیر باغچامیزین یاسمنی
داغلاردا و باغلاردا یاغیر یاز یاغیشی
ائل کؤنلونو اوخشور کهلیگین ناز باخیشی
یئملیک گؤبه لک دونبالان ایت بورنو چیخیر
آلچایلا دولان باغلار آغاجلاری ییخیر
تورپاغ گؤیه ریر گؤم گؤی اولور داغ دره لر
قیزلار و گلین لرده ییغیر بول تره لر
بول بول زمی لردن بوی آتیر غاز آیاغی
اوشقون و بیزوبورنو ستلجم آلاغی
گؤم گؤی گؤیه ریر گزنه و تورشک چوبانک
سالمانچا وقانقال چیریش ایله بابانک
باخ گؤر بوی آتیب کندیمیزین شاه تره سی
خاشخاشی، توهلوجه سی، همده اود تره سی
درمان ساییلیر چؤلده کی هر بیتگی بیزه
تانریم یارادیب بیتگینی هر دردیمیزه
ذووق ایله گَزین چؤل لری ای اهل وطن
بلکه دیریلیب عشقه گله روح ایله تن
(سه س سیز) دئمیرم های سالیرام خالقیما من
چیخ چؤل لره، ایسلان، اوشو، بات پالچیغا سن
A.R. (SESSIZ)
فانی دونیا
فانی دونیا
بیلین دوستلار بو دونیا فانی دیر فانی
وفاسی وارسا گر، سؤیله گؤروم هانی
صفا و عشق و مهر و خوش کئچیرمک له
حیاتین هر صداسیندا اولون بانی
محبت سئوگی دیر بیزدن قالان یالنیز
دوشونمک دیر حیاتین عزتی شانی
صداقت معرفتله یئر سالین دیلده
فقط اینسانی قان، بوشلا به یی خانی
بوگون وارسان، صاباحدان یوخدور اخبارین
قوجاغلا مئهریله سن دوستو دوشمانی
یئرین یوردون قانان کس لرله اول همدم
قانانلاردیر حیات ایچره بالین شانی
صفادن ذووق آلار هر دم قانان اینسان
عؤمور وارکن گز اینسانی آرا تانی
A.R SESSIZ
ایستَر
ایستر
کؤنلوم سنی ای گول گئجه گوندوز سحر ایستر
احوالینی هر آندا اؤزومدن بَتَر ایستر
یوخدور سنه تای سئوگیلی جانان بو جاهاندا
سئومکله ووروللام جانیم الدن گئدر ایستر
من عشق ایله، آسوده لیگی وئرمیشم الدن
سن بیلمه دین عشق عالمی سندن نه لر ایستر
سن سن منیم عالمده اینان سئوگی پناهیم
کؤنلوم قوزو تک مهرینی هر آن مه لر ایستر
یاندیم و کول اولدوم سنین عشقینده من هر آن
گؤز یولداکی یار جانیمی بیردن گه لر ایستر
غم سؤیله مه غمدن دئمه گه ل (سَس سیز)ه رحم ائت
بیر گؤر بو یازیق کؤنلو پریشان نه لر ایستر
سیگار
سیگــار
چوخ عجیب گولمه لی سیگار چکیسن
ایتیل اؤل اؤلــمه لی سیگار چکسین
وئـرمیسن پـول لارینی مـــال بوغانا
لعنــت اولــسون سنه سیگار ساتانا
پـوفـلویورســن بـو یـانـا هـم اویانا
پول قــوتولوب بسته اولــموش دانا
چوخ عجیب گولمه لی سیگار چکیسن
ایتیـل اؤل اؤلـمه لی سیگار چکیسن
مکــتبدن ائتــدین اؤزونـــو آسـوده
آتیبـــسان کیــتاب و دفــتـری دوره
چوخ چکیب پاپریزی اوخشورسان موره
اولمـوسـان اینـدی ایکی جور بیر جوره
چوخ عجیب گولمه لی سیگار چکیسن
ایتیـل اؤل اؤلمـه لی سیگار چکیسن
کیــمی اؤیــرتدی بــو سیـگاری سنه
پاپیـشیبــدیــر سنـــه او مثــل گنه
کــی دئـییرسن «بیر نفس ووردا» منه
ســارالیــب اوز چــورویــوبــدور اتنه
چوخ عجیب گولمه لی سیگار چکیسن
ایتیــل اؤل اؤلمه لی سیگار چکیسن
دوروســان کـــوچه باشیندا گئجه لر
آز قــالیر نه نه ن بابان جان ائده لر
تـرک سیگاری نه نه ن چوخ سئوه لر
دئییسن ترک قیلان بس نئجه ائله ر
چوخ عجیب گولمه لی سیگار چکیسن
ایتیــل اؤل اؤلمه لی سیکار چکسین
توســدونون خیری سنه یوخدور اینان
بــو سؤزه سنــده یئتیر دین و ایمان
حق ســؤزه ائتــمه حیـاتیندا گومان
بوغــار آخیر سنــی بو توستو دومان
چوخ عجیب گولمه لی سیگار چکیسن
ایتیــل اؤل اؤلمه لی سیکار چکسین
آییــل اوغــلان نیـیه سیگار چکیسن
مغزه علــم اک نییه سیــگار اکیسن
گــؤرونـــور تیریاکـا معتاد تکی سن
ووروســان سیگارا زورلا پــــوکی سن
چوخ عجیب گولمه لی سیگار چکیسن
ایتیــل اؤل اؤلمه لی سیگار چکیسن
چــوخ چکیبسن اولـوسان تنگی نفس
گئتدی سیگار چکمییه ن سنده ته له س
اولاجـــــاق اوز ائـــولادیندا بو هوس
چون سؤزون افـکارین اولوبدور نحس
چوخ عجیب گولمه لی سیگار چکیسن
ایتیـــل اؤل اؤلمه لی سیکار چکیسن
اؤلـــوب عقلیـن شعورون زایل، آییل
تــرک ائله سیـگاری، ده «پاتتا پاخیل»
قوی سئوینسین بو ایشه دوست و فامیل
بو ضــــــلالت کؤرپوسون سنده آتیل
چوخ عجیب گولمه لی سیگار چکیسن
آییـــــل اوغلان نییه سیگار چکیسن
sessiz
قیش گلدی
قیش گلدی وطنداش ائوی یوخدور
غم غصه سی بولدور داها چوخدور
یئر تیتره مه سی
یاس توره نی دولوب خالقین کونلونه
وطنیم غصه ده وطنیم غمده
عشقیم سئوگیم جانیم چیخیب یادیمدان
وطنیم غصه ده وطنیم غمده
قارا دومان هارای سالدی وطنده
مینلر اینسان ائوسیز قالدی وطنده
کدرله غم چالقی چالدی وطنده
وطنیم غصه ده وطنیم غمده
وطنیم آغلاییر کونلومو یاخیر
گویدن کدر یاغیر یئرده غم آخیر
آغری وورور آجی شیمشک تک چاخیر
وطنیم غصه ده وطنیم غمده
وطنیم غصه ده وطنیم غمده
A.R... SESSIZ
سنسیز اولمور
سنسیز اولمور
سنی منده ن آییرانا سؤزوم وار
منده اینان حیات بویدا دؤزوم وار
اودا سویا دوشوب یولدان کئچه ره م
اوزون ایللر سنده منیم گؤزوم وار
سنسیز اولمور سنسیز لال دی بو کؤنلوم
بوتون دولو قالماقال دی بو کؤنلوم
هر آن سنله هم خیال دی بو کؤنلوم
سنی گؤرسم سنه چوخلو سؤزوم وار
سنی گؤرسم سنه چوخلو سؤزوم وار
A.R...SESSIZ
گول
گول
گیزلی قالمیش کؤنول داغی دئییلسن
اوره ک سیخان آخشام چاغی دئییلسن
گؤزه ل یارسان سن کی یاغی دئییلسن
گول گول اوچون گولده گولسون سن اوچون
قاباقجیل اول اویناماغا گولماغا
جان آتما سن سارالماغا سولماغا
فیکیر وئرمه غم کدره دولماغا
گول گول اوچون گولده گولسون سن اوچون
مئهریبان اول دوستونا هم دوشمنه
کؤنول وئرسین یاغی سنه یار سنه
همیشه لیک بیرجه سؤزوم وار سنه
گول گول اوچون گولده گولسون سن اوچون
بوگون وارام صاباح یوخام بلکه ده
من اینسانام سئوگیلی یم هر کسه
آغلاما هئچ حیاتیندا بیر کره
گول گول اوچون گولده گولسون سن اوچون
گولوش وئره ر حیاتا یئنی لیک لر
یئتر بیر گون سونا بو دیری لیک لر
غرورسوز اول بار وئرمز ایری لیک لر
گول گول اوچون گولده گولسون سن اوچون
خوش باخیش اول قوجایا هم جاوانا
اومید قالما باش اوستونده تاوانا
دؤزوملو اول توخلوغا هم یاوانا
گول گول اوچون گولده گولسون سن اوچون
بو حیاتا دردده غصه ده یاردی
گئنیش دونیا بؤیوک اینسانا داردی
اولسون کی غم کدرده واردی
گول گول اوچون گولده گولسون سن اوچون
دئییب گولمک اینسانی شنلندیره ر
یئری گؤیو داشی دا دیللندیره ر
غصه هردم حیاتی لیللندیره ر
گول گول اوچون گولده گولسون سن اوچون
A.R....SESSIZ
کؤنلومده هایدی سَسدی